Psa 145 | MEU | STEP | Egu Dirava bona egu Pavapava, oi baina imodaimu, bona oi ladamu baina hanamoa ela bona hanaihanai.

Psalms 145

1 Egu Dirava bona egu Pavapava, oi baina imodaimu,
bona oi ladamu baina hanamoa ela bona hanaihanai.
2 Dina iboudiai baina hanamomu,
bona ladamu baina imodaia ela bona hanaihanai.
3 Iehova na bada, ia iheatolaina danu baine bada;
ena herea-dae na asi itahuna dalana.
4 Uru ta ese uru ta enai emu ḡaukara baine hanamolaia,
bona emu siahu karadia baine gwaurai hedinarai.
5 Emu lohia toadia hairaidia bona emu hoa karadia
baina haerodia.

6 Emu kara siahudia mai garidia na
taunimanima ese bae gwauraidia;
emu herea-dae baina gwauraia hedinarai.
7 Emu harihari-bada haridia bae hapiu,
bona emu kara maoromaoro na bae anelai lalo-dika.

8 Iehova na mai ena harihari-bada bona mai ena hebogahisi;
ena badu e halahemu, ena hebogahisi na bada herea.
9 Iehova ese taunimanima iboudiai e kara namo henidiamu,
vada e kara ḡaudia iboudiai na ia ese e bogadia hisimu.

10 Iehova e, o kara ḡaudia iboudiai ese bae hanamomu,
bona emu helaḡa taudia ese bae imodaimu.
11 Emu basileia hairaina bae herevalaia,
bona emu siahu bae gwauraia;
12 emu siahu karadia na taunimanima natudia bae hadibalaidia,
bona emu basileia hairaina ḡoeva-daena danu.
13 Emu basileia na mia-hanaihanai basileiana,
emu lohia na e hesiriumu uru iboudiai lalodiai.

Iehova na mai ena heabidadama, ena hereva iboudiai lalodiai,
bona mai ena harihari-bada, ena kara iboudiai lalodiai.
14 Iehova ese e ketomu taudia iboudiai na e abidia isimu;
e nunumaidia tarimu taudia iboudiai na ia ese e veridia toremu.
15 Mata iboudiai ese oi e haḡeremumu;
oi ese adia o henidiamu, ta ta ena nega ena nega ai.
16 Oi imamu o kehoamu,
mauri ḡaudia iboudiai bogadia o hakunudiamu.
17 Iehova ena dala iboudiai na mamaoro-mamaoro,
ena kara idoinai na mai hebogahisina.
18 Iehova na e boi heniamu taudia iboudiai dekedekediai,
e boi heniamu mai momokanidia ida taudia iboudiai dekedekediai.
19 Ia garina e garimu taudia iboudiai edia ura na ia ese e haḡuḡuruamu,
edia taitai danu e kamonaimu, bona e hamauridiamu.
20 Ia e ura heniamu taudia iboudiai na Iehova ese e hamauridiamu,
a kara dika taudia iboudiai na ia ese baine habuadia tari.
21 Lau udugu ese Iehova baine imodaia;
taunimanima iboudiai ese ia ladana helaḡana bae hanamoa
ela bona hanaihanai.